1ܒܲܣ ܡܸܢܝܸܚܘܿܢ ܡܸܢܵܘܟܼܘܿܢ ܟܠܵܗ̇ ܒܝܼܫܘܼܬܵܐ؛ ܘܟܠܵܗ̇ ܦܸܠܡܵܐ؛ ܘܡܲܣܲܒܼ ܒܲܐܦܘܼܬܵܐ؛ ܘܒܲܚܸܠܵܢܘܼܬܵܐ؛ ܘܟܠܵܗ̇ ܡܚܵܝܬܵܐ ܕܕܲܪܗܲܩ؛ 2ܐܲܝܟܼ ܝܲܠܘܼܕܹ̈ܐ ܙܥܘܿܪܹ̈ܐ ܕܬܵܙܵܐ ܗ݇ܘܝܼܹܐ ܝ݇ܢܵܐ؛ ܫܲܗ݇ܘܸܬܘܿܢ ܠܗܹܡܸܙܡܵܢ ܐܲܝܟܼ ܕܠܚܲܠܒܼܵܐ ܪܘܼܚܵܢܵܝܵܐ ܘܨܸܦܝܵܐ؛ ܕܒܝܼܵܗ̇ ܦܵܝܫܝܼܬܘܿܢ ܓܘܼܪܘܸܣܹܐ ܠܦܘܼܪܩܵܢܵܐ؛ 3ܐܸܢ ܛܥܸܡܠܵܘܟܼܘܿܢ ܕܛܵܒܼܵܐ ܝ݇ܠܹܗ ܡܵܪܝܵܐ. 4ܗ̇ܘ ܕܠܟܸܣܠܹܗ ܩܲܪܒܘܼܢܹܐ ܝ݇ܬܘܿܢ؛ ܕܝܼܠܹܗ ܟܹܐܦܵܐ ܚܵܝܵܐ؛ ܡܘܼܣܠܝܼܵܐ ܡ̣ܢ ܒܢܲܝ̈ܢܵܫܵܐ؛ ܐܝܼܢܵܐ ܓܘܼܒܝܵܐ ܘܡܵܪܹܐ ܛܝܼܡܵܐ ܠܟܸܣ ܐܲܠܵܗܵܐ؛ 5ܘܐܘܼܦ ܐܲܚܬܘܿܢ ܐܲܝܟܼ ܟܹܐܦܹ̈ܐ ܚܵܝܹ̈ܐ ܦܘܼܫܘܿܢ ܒܸܢܝܹܐ ܒܲܝܬܵܐ ܪܘܼܚܵܢܵܐ؛ ܠܟܵܗܢܘܼܬܵܐ ܩܲܕܝܼܫܬܵܐ؛ ܠܡܵܣܘܿܩܹܐ ܕܸܒܼܚܹ̈ܐ ܪ̈ܘܼܚܵܢܹܐ؛ ܡܲܩܒܘܼܠ ܩܵܕ݇ܡ ܐܲܠܵܗܵܐ ܒܝܼܲܕ ܝܼܫܘܿܥ ܡܫܝܼܚܵܐ. 6ܣܵܒܵܒ ܕܐ݇ܡܝܼܪܵܐ ܝ݇ܠܹܗ ܒܟܬܵܒܼܵܐ؛ ܗܵܐ؛ ܡܲܬܘܼܒܼܹܐ ܝ݇ܘܸܢ ܒܨܸܗܝܘܿܢ ܟܹܐܦܵܐ ܓܘܼܒܝܵܐ ܕܡܵܪܹܐ ܛܝܼܡܵܐ؛ ܒܪܹܫ ܩܘܼܢܓ̰ܝܼܬܵܐ؛ ܘܗ̇ܘ ܕܗܲܡܸܢ ܒܝܼܹܗ ܠܹܐ ܢܵܚܸܦ. 7ܒܲܣ ܐܸܠܵܘܟܼܘܿܢ ܦܸܫܠܹܗ ܝܘܼܗ݇ܒܼܵܐ ܐܵܗܵܐ ܐܝܼܩܵܪܵܐ؛ ܠܐܵܢܝܼ ܕܗܲܡܸܢܝܼ؛ ܐܝܼܢܵܐ ܠܐܵܢܝܼ ܕܠܵܐ ܡܲܨܝܸܬܝܼ؛ ܟܹܐܦܵܐ ܕܡܘܼܣܠܹܐܠܗ݇ܘܿܢ ܒܲܢܹ̈ܐ؛ ܗܲܪ ܗ̇ܘ ܗ݇ܘܹܐܠܹܗ ܠܪܹܫ ܩܘܼܢܓ̰ܝܼܬܵܐ؛ 8ܘܟܹܐܦܵܐ ܕܬܲܪܩܲܠܬܵܐ؛ ܘܩܵܝܵܐ ܕܟܦܘܼܪܝܵܐ؛ ܐܵܢܝܼ ܕܟܹܐ ܬܲܪܩܸܠܝܼ ܟܲܕ ܠܹܐ ܡܲܨܝܸܬܝܼ ܠܗܹܡܸܙܡܵܢ؛ ܕܐܘܼܦ ܠܕܵܐܗܵܐ ܦܝܼܫܹܐ ܝ݇ܢܵܐ ܡܘܼܬܒܼܹܐ. 9ܐܝܼܢܵܐ ܐܲܚܬܘܿܢ ܐܘܼܓ̰ܵܓܼ ܓܘܼܒܝܼܬܵܐ ܝ݇ܬܘܿܢ؛ ܟܵܗܢܘܼܬܵܐ ܡܲܠܟܵܝܬܵܐ؛ ܛܵܝܸܦܵܐ ܩܲܕܝܼܫܵܐ؛ ܡܸܠܲܬ ܠܝܵܪܬܘܼܬܵܐ (ܕܐܲܠܵܗܵܐ)؛ ܕܡܲܫܚܸܕܝܼܬܘܿܢ ܥܵܓ̰ܸܒ̈ܘܵܬܵܐ ܕܗ̇ܘ ܕܩܲܡ ܩܵܪܹܐܠܵܘܟܼܘܿܢ ܡ̣ܢ ܚܘܼܒܼܝܵܐ ܠܒܲܗܪܹܗ ܥܓ̰ܝܼܒܵܐ؛ 10ܐܵܢܝܼ ܕܡ̣ܢ ܩܵܕ݇ܡܵܝܬܵܐ ܠܹܐ ܝ݇ܬܘܿܢ ܗَܘܵܘ ܛܵܝܸܦܵܐ؛ ܐܝܼܢܵܐ ܐܵܕܝܼܵܐ ܛܵܝܸܦܵܐ ܕܐܲܠܵܗܵܐ؛ ܐܘܼܦ ܪ̈ܲܚܡܹܐ ܠܲܝܬ ܗَܘܵܘ ܥܲܠܵܘܟܼܘܿܢ؛ ܐܝܼܢܵܐ ܐܵܕܝܼܵܐ ܦܸܫܠܵܘܟܼܘܿܢ ܪܚܝܼܡܹܐ. 11ܡܘܼܚܸܒ̈ܝܼ؛ ܦܲܪܦܘܼܠܹܐ ܝ݇ܘܸܢ ܒܝܼܵܘܟܼܘܿܢ ܐܲܝܟܼ ܢܘܼܟܼܪ̈ܵܝܹܐ ܘܐܲܝܟܼ ܡܵܫܵܚܲܛܹ̈ܐ؛ ܦܪܘܿܩܘܿܢ ܡ̣ܢ ܫܲܗ݇ܘܲܬܝܵܬܹ̈ܗ ܕܦܲܓܼܪܵܐ؛ ܐܲܢܹܐ ܕܟܹܐ ܥܵܒܼܕܝܼ ܦܠܵܫܵܐ ܠܕܲܪܩܘܼܒܼܠ ܕܓܵܢܵܐ؛ 12ܘܗܵܘܝܼ ܫܲܦܝܼܪܹ̈ܐ ܚܕܵܪ̈ܵܘܟܼܘܿܢ ܓܵܘ ܡܸܠܲܬܹ̈ܐ؛ ܘܒܗ̇ܝ ܕܗܲܡܙܸܡܝܼ ܥܲܠܵܘܟܼܘܿܢ ܐܲܝܟܼ ܥܵܒܼܕܵܢܹ̈ܐ ܕܒܝܼܫܬܵܐ؛ ܚܵܙܝܼ ܦܘܼܠܚܵܢܵܘ̈ܟܼܘܿܢ ܫܲܦܝܼܪܹ̈ܐ؛ ܘܫܵܒܚܝܼ ܠܐܲܠܵܗܵܐ ܒܝܵܘܡܵܐ ܕܒܘܼܚܪܵܢܵܐ. 13ܦܘܼܫܘܿܢ ܙܲܒܛ ܠܟܠ ܦܘܼܩܵܕܵܐ ܕܒܢܲܝ̈ܢܵܫܵܐ ܒܚܵܬܸܪ ܕܡܵܪܝܵܐ؛ ܐܸܢ ܠܡܲܠܟܵܐ ܐܲܝܟܼ ܪܹܫܵܐ؛ 14ܘܐܸܢ ܠܗܵܟܝܼܡܹ̈ܐ؛ ܐܲܝܟܼ ܐܵܢܝܼ ܕܡܸܢܹܗ ܟܹܐ ܦܵܝܫܝܼ ܫܘܼܕܪܹܐ ܠܬܘܼܥܠܵܐ ܕܥܵܒܼܕܵܢܹ̈ܐ ܕܒܝܼܫܬܵܐ؛ ܘܠܚܸܩܪܵܐ ܕܥܵܒܼܕܵܢܹ̈ܐ ܕܛܵܒܼܬܵܐ. 15ܣܵܒܵܒ ܗܲܕܟܼܵܐ ܝ݇ܠܹܗ ܪܸܙܵܝܹܗ ܕܐܲܠܵܗܵܐ؛ ܕܒܦܘܼܠܚܵܢܵܘ̈ܟܼܘܿܢ ܫܲܦܝܼܪܹ̈ܐ ܡܲܫܬܸܩܝܼܬܘܿܢ ܠܠܵܐ ܝܕܸܥܬܵܐ ܕܢܲܙܲܢܹ̈ܐ؛ 16ܐܲܝܟܼ ܐܵܙܵܕܹ̈ܐ؛ ܘܠܵܐ ܐܲܝܟܼ ܐ݇ܢܵܫܹ̈ܐ ܕܗ݇ܘܝܼܬܵܐ ܝ݇ܠܵܗ̇ ܐܸܠܵܝܗܝ ܐܵܙܵܕܘܼܬܵܝܗܝ ܟܵܣܵܝܬܵܐ ܠܒܝܼܫܘܼܬܵܝܗܝ؛ ܐܸܠܵܐ ܐܲܝܟܼ ܩܵܘܠܹ̈ܐ ܕܐܲܠܵܗܵܐ. ܠܟܠ ܐ݇ܢܵܫܵܐ ܥܒܼܘܿܕܘܿܢ ܐܝܼܩܵܪܵܐ. 17ܠܐܵܚܘܿܢܘܵܬܵܘ̈ܟܼܘܿܢ ܡܲܚܸܒܘܿܢ. ܡ̣ܢ ܐܲܠܵܗܵܐ ܙܕܸܥܡܘܿܢ. ܘܠܡܲܠܟܹ̈ܐ ܡܝܵܩܪܘܿܢ. 18ܪܹ̈ܓܵܘܵܬܹܐ؛ ܦܘܼܫܘܿܢ ܙܲܒܛ ܠܐܵܓܼܵܝܵܘ̈ܟܼܘܿܢ ܒܟܠܵܗ̇ ܙܕܘܼܥܬܵܐ؛ ܠܵܐ ܗܲܪ ܠܛܵܒܼܹ̈ܐ ܘܠܡܲܟܝܼܟܼܹ̈ܐ؛ ܐܸܠܵܐ ܐܘܼܦ ܠܥܲܣܩܹ̈ܐ. 19ܣܵܒܵܒ ܐܵܗܵܐ ܝ݇ܠܵܗ̇ ܡܸܢܬܵܐ؛ ܐܸܢ ܒܚܵܬܸܪ ܕܐܸܢܝܲܬ ܠܟܸܣ ܐܲܠܵܗܵܐ ܐ݇ܢܵܫܵܐ ܛܵܥܸܢ ܥܹܩܘܼܝ ܟܲܕ ܩܵܒܘܿܠܹܐ ܚܲܫܵܐ ܒܢܵܐܗܲܩ. 20ܐܝܼܢܵܐ ܡܘܼܕܝܼ ܚܸܩܪܵܐ ܐܸܢ ܟܲܕ ܚܛܹܝܠܵܘܟܼܘܿܢ ܘܦܸܫܠܵܘܟܼܘܿܢ ܩܘܼܪܦܸܚܹܐ ܚܵܡܠܝܼܬܘܿܢ؛ ܐܸܠܵܐ ܐܝܼܡܲܢ ܕܥܵܒܼܕܝܼܬܘܿܢ ܕܨܦܵܝܝܼ ܘܡܲܠܝܸܨܝܼ ܠܵܘܟܼܘܿܢ ܘܚܵܡܠܝܼܬܘܿܢ؛ ܐܵܗܵܐ ܝ݇ܠܵܗ̇ ܡܸܢܬܵܐ ܠܟܸܣ ܐܲܠܵܗܵܐ. 21ܣܵܒܵܒ ܕܠܕܵܐܗܵܐ ܦܸܫܠܵܘܟܼܘܿܢ ܩܸܪܝܹܐ؛ ܕܐܘܼܦ ܡܫܝܼܚܵܐ ܩܘܼܒܸܠܹܗ ܚܲܫܵܐ ܡܒܵܕܵܠܲܢ؛ ܘܫܒܸܩܠܹܗ ܐܸܠܵܘܟܼܘܿܢ ܐܵܗܵܐ ܛܘܼܦ̮ܣܵܐ؛ ܕܐܲܚܬܘܿܢ ܒܫܵܘܦܵܦ̈ܘܼܗܝ ܚܵܕܪܝܼܬܘܿܢ. 22ܗ̇ܘ ܕܠܵܐ ܥܒܸܕܠܹܗ ܚܛܝܼܬܵܐ؛ ܐܘܼܦ ܠܵܐ ܦܸܠܡܵܐ ܡܫ݇ܟ̰ܸܚܠܹܗ ܒܦܘܼܡܹܗ؛ 23ܗ̇ܘ ܕܟܲܕ ܦܵܐܹܫ ܗَܘܵܐ ܨܘܼܥܪܵܐ؛ ܡܒܵܕܵܠܘܼܗ̇ ܠܹܐ ܨܵܥܸܪ ܗَܘܵܐ؛ ܘܟܲܕ ܩܵܒܸ̇ܠ ܗَܘܵܐ ܚܲܫܵܐ؛ ܠܹܐ ܐܵܟܼܸܠ ܗَܘܵܐ ܓܸܙܡܹ̈ܐ ܐܸܠܵܐ ܟܹܐ ܣܵܦܹܐ ܗَܘܵܐ ܕܝܼܘܵܢܹܗ ܠܕܲܝܵܢܵܐ ܕܗܲܩܘܼܬܵܐ؛ 24ܗ̇ܘ ܕܓܵܢܹܗ ܛܥܸܢܹܗ ܚ̈ܛܝܼܵܬܲܢ ܒܦܲܓܼܪܹܗ ܥܲܠ ܩܲܝܣܵܐ؛ ܕܐܲܚܢܲܢ؛ ܟܲܕ ܡܝܼܬܹ̈ܐ ܝ݇ܘܵܚ ܠܚܛܝܼܵܐ؛ ܠܙܲܕܝܼܩܘܼܬܵܐ ܕܚܲܝܵܚ؛ ܕܒܡܲܚܘܵܬܹ̈ܐ ܕܝܼܹܗ ܦܸܫܠܵܘܟܼܘܿܢ ܒܘܼܣܡܹܐ؛ 25ܣܵܒܵܒ ܕܒܸܚܠܵܛܵܐ ܝ݇ܬܘܿܢ ܗَܘܵܘ ܐܲܝܟܼ ܥܸܪ̈ܒܹܐ؛ ܐܸܠܵܐ ܕܸܪܵܘܟܼܘܿܢ ܐܵܕܝܼܵܐ ܠܟܸܣ ܪܵܥܝܵܐ ܘܐܲܦܸܣܩܘܿܦܵܐ ܕܓܵܢܵܬܵܘ̈ܟܼܘܿܢ.